І застанецца подзвіг у памяці людской…

Субота, 27 сакавіка 2021

Жыхары аграгарадка Хідры ганарацца сваім земляком – мараком-падводнікам Аляксандрам Лісковічам. Ён гераічна загінуў пры выкананні свайго службовага абавязку, на сваім прыкладзе даказаў, што значыць быць верным прысязе.

21 кастрычніка 2020 года на фасадзе ДУА «Хідрынскі  навучальнапедагагічны комплекс дзіцячы сад-сярэдняя школа», дзе ў свой час вучыўся Аляксандр Лісковіч,  была адкрыта мемарыяльная памятная дошка ў яго гонар. А сёлета 19 сакавіка, калі згуртаванне маракоў-падводнікаў адзначае сваё свята, адбылося яе асвячэнне. Ва ўрачыстым мітынгу, прысвечаным гэтай падзеі, прынялі ўдзел прадстаўнікі органаў улады, сваякі і блізкія героя, члены Беларускага саюза ваенных маракоў, члены экіпажа падводнай лодкі С-178, прадстаўнікі генеральнага консульства Расійскай Федэрацыі ў г. Брэсце, а таксама вучні школы.

Маракі-падводнікі запасу, у строгай ваеннай форме чорнага колеру, якую ўпрыгожвалі шматлікія ўзнагароды, віталі адзін аднаго паводле сваіх традыцый. Заўважалася іх шматгадовая ваенная выпраўка, адчувалася жыццёвая мудрасць і тонкае пачуццё гумару. Старшыня ГА «Беларускі саюз ваенных маракоў» Валерый Халадзілін адзначыў, што гэтае мерапрыемства мае важнае значэнне не толькі для Кобрыншчыны, але і для ўсёй нашай краіны. Беларусь увайшла ў гісторыю як радзіма смелых і адважных маракоў. З 1945 года ваенную службу на флоце прайшло каля аднаго мільёна беларусаў. За здзейсненыя подзвігі тысячы маракоў былі ўшанаваны высокіх дзяржаўных узнагарод СССР. Звання Героя Савецкага Саюза ўдастоены 9 маракоў-беларусаў, 74 нашыя землякі атрымалі адміральскія званні.

Месца для подзвігу ёсць заўсёды. Вядучыя мітынгу нагадалі біяграфію Аляксандра Лісковіча і падзеі, якія ўпісалі яго імя ў спіс герояў.

Нарадзіўся Аляксандр у 1961 годзе ў в. Каташы. Дзяцінства і юнацтва хлопца прайшло, як і ў многіх яго аднагодкаў. У Хідрынскай школе Саша закончыў 8 класаў. Адслужыўшы тэрміновую службу ў ваенна-марскім флоце, Аляксандр выбраў прафесію падводніка. У верасні 1981 года курсант трапіў на стажыроўку на субмарыну С-178 у чацвёртую брыгаду падводных лодак Ціхаакіянскага флоту. А 21 кастрычніка здарылася страшная трагедыя – субмарына сутыкнулася з цеплаходам «Рэфрыжаратар-13», у выніку чаго атрымала прабоіну, што прывяло да патаплення субмарыны. Скаардынаваныя, узважаныя дзеянні маракоў, што знаходзіліся ў чацвёртым адсеку, у ліку якіх быў і наш зямляк, забяспечылі герметызацыю пераборкі і выратавалі жыцці падводнікам у трэцім адсеку. Тады загінула 32 маракі-падводнікі.

Трывожны набат, які адлічваў хвіліну маўчання, болем адгукаўся ў сэрцах удзельнікаў мітынгу. Цырымонію асвячэння памятнай дошкі Аляксандру Лісковічу правёў настаяцель Прадцечанскай царквы аг. Хідры Андрэй Баніфацьеў.

Лагічным   працягам мерапрыемства стала сустрэча памяці, якая адбылася ў Хідрынскім цэнтры культуры і вольнага часу. Словы пашаны герою выказалі намеснік старшыні райвыканкама Іван Каробка, старшыня Хідрынскага сельвыканкама Пётр Назарук, консул-саветнік Расійскай Федэрацыі ў г. Брэсце Павел Марозаў, а таксама маракі, у ліку якіх былі госці з Масквы. Гледачоў чакала насычаная культурная праграма.

У межах памятных мерапрыемстваў адбылася і цырымонія ўручэння юбілейных медалёў і сувеніраў маракам-падводнікам. Падарункі атрымалі і тыя, хто прымаў удзелу арганізацыі гэтага мерапрыемства. Подзвіг Аляксандра Лісковіча з’яўляецца для маладога пакалення прыкладам мужнасці, самаадданасці, сяброўства.

Раман МЕЛЬНІК.